Cyłkownje 908 ludźi na listowych wólbach so wobdźěliło
Njebjelčicy (SN/JaW). Prěni Serbski sejm je wuzwoleny. Sobotu su čłonojo wólbneho wuběrka iniciatiwneje skupiny za serbske ludowe zastupnistwo w Njebjelčanskim gmejnskim zarjedźe z wuličenjom listowych wólbow jeho zestawu zwěsćili. Nimo iniciatiwnikow sćěhowachu wuličenje wjacori hosćo z Hornjeje, srjedźneje a Delnjeje Łužicy, žurnalisća kaž tež wosmjo njewotwisni wólbni wobkedźbowarjo z Pólskeje, Čěskeje a Italskeje – mjez nimi zastupjerjej strony Europska swobodna alianca (EFA) Marta Bainka a dr. Christian Kollmann kaž tohorunja čěski zapósłanc Europskeho parlamenta a přećel Serbow Jaromír Kohlíček.