Steffi Liebscherowa ze swojimaj rukomaj wosebje najmjeńšich pacientow hoji

Dźesać lět tomu mjeztym je, zo praktikuje Steffi Liebscherowa w Budyšinje na Kurta Pchalekowej, njedaloko Smolerjec kniharnje. A štóž ju znaje, widźi Budyšanku husto ze Serbami so rozmołwjeć. Mnozy su so dali wot jeje poskitka přeswědčić a słušeja mjeztym do kruteho zdónka jeje pacientow.

Bjezdwěla wosebitosć poskitka Steffi Liebscheroweje je, zo móža serbscy zajimcy wšitko to, štož wona na swojej internetnej stronje poskića, w swojej maćeršćinje čitać. Zeserbšćiła je informacije, kotrež čitarja dosć wužaduja, dokelž po­dawaja lědma wužiwane słowa a wopři­jeća, Božena Braumanowa. Za tajke terapeutiske předewzaće je to skerje rědki pad, hdyž wužiwar wě, zo njeje mějićelka Budyskeje přirodohojerskeje praksy serbskeho pochada.

Dopomnjenki a nowinki

Steffi Liebscherowa wita mje při durjach – wězo serbsce – a poruča mi sej črije zuć. Kaž hižo před dźewjeć lětami, jako ju prěni raz wopytach, poskitk rady wužiwam, a při šalce horceho čaja na to woměrje bjesadujemoj.