Sakski program za inkluziju zmóžni předčitansku funkciju w serbšćinje

Budyšin (SN/at). 27. měrca 2009 bě zwjaz­kowa republika Konwenciju UNO wo prawach zbrašenych ratifikowała. Składnostnje dźesateje róčnicy wopyta sakska ministerka za wědomosć a wuměłstwo dr. Eva-Maria Stange (SPD) wčera Serbski institut. Tam je wona prócowanja zwonkauniwersitneho slědźenišća wo poskitki ludźom ze zbrašenjom připóznała a zdobom spěchowansku zdźělenku za na­ročny projekt přepodała. „Trjebamy přewuknjenje, sensibilizaciju za barjery w towaršnosći“, dr. Stange podšmórny. Po jeje słowach su z tym na sak­skich wysokich šulach a zwonka­uniwersitnych slědźenišćach derje postupowali. W Serbskim instituće su na přikład informaciske tafle při zachodźe a w domje samym runje tak z braille-pismom za hubjenje widźacych popisane.