Budyšin (SN/JaW). Tworjenje spisowaćelki Hańže Bjeńšoweje bě srjedźišćo wčerawšeho čitarskeho wječorka w Budyskej Smolerjec kniharni. Zajim na spisach Bjeńšoweje, kotraž by minjenu srjedu stoćiny swjećiła, bě wulki. Wjac hač 40 zajimcow bě přeprošenje towarstwa Přećelow Smolerjec kniharnje sćěhowało.
Měrana Cušcyna a dr. Franc Šěn běštaj spodobny program zestajałoj, kotryž sahaše wot spočatkow hač k poslednim twórbam Hańže Bjeńšoweje. Přewšo zajimawe bě, słyšeć wujimki z interviewa ze spisowaćelku. Kaž dr. Šěn wujasni, bě spočatk spisowaćelenja Bjeńšoweje wobdźělenje na literarnym wubědźowanju. Sama sej wona mysleše, zo myto njedóstanje. Wšako bě „žadane, powědančko z pisanskej mašinu napisać. Njemějach pak žanu“, bě spisowaćelka z paska słyšeć. Z rukopisnej twórbu pak zdoby sej wona dźesate myto. Tež prěnje kritiki, kotrež běchu serbscy literaća w recensijach podawali, dr. Šěn předstaji. Tak měješe Frido Mětšk jeje prěnju stawiznu za kič. Jurij Brězan ju porno tomu pohonjowaše dale pisać.
