Nowa wustajeńca w Serbskim muzeju mjezynarodna a žanry přesahowaca

Budyšin (SN/bn). Zajutřišim wotewru w Budyskim Serbskim muzeju wosebitu wustajeńcu „Wobrazy krajiny – Podobe pokrajine – Bilder einer Landschaft. Přechod – Prehod – Übergang 03“. Přehladka je wuslědk projekta samsneho mjena, organizowaneho wot Załožby za serbski lud, Serbskeju muzejow Budyšin a Choćebuz, Muzeja za moderne a načasne wuměłstwo Koroška (KGLU) Slovenj Gradec (Słowjenska) a Muzeja moderneho wuměłstwa Korutanskeje (MMKK) w Celovecu. Ekspozicija wopřijima twórby cyłkownje dwanaće wuměłcow resp. wuměłskich kolektiwow z Němskeje, Awstriskeje a Słowjenskeje. Łužicu reprezentuja Iris Brankačkowa, Hella Stoletzki, Michael Kruscha a Frauke Rahr. Mjez mjezynarodnymi zastupjerjemi su Nika Autor a skupina IRWIN ze Słowjenskeje kaž tež Korutanskaj Słowjencaj Marko Lipuš­ a Karl Vouk.