Reakcije na pozitiwny wotum Žitawčanow za kulturnu stolicu Europy

Žitawa (SN/bn). Jako jeničke a dotal prěnje město, kotrež chce so w lěće 2025 z kulturnej stolicu Europy stać, je Žitawa wobydlerski rozsud wo kandidaturje přewjedła. Paralelnje ke komunalnym a europskim wólbam mějachu měšćenjo rozsudźić, hač namjet podpěruja. Dohromady 8 870 Žitawčanow wupraji so za kandidaturu, štož woznamjenja 74,2 procen- taj wotedatych hłosow. Wjace hač połojca wólbokmanych (56,7 %) je so na wothłosowanju wobdźěliło. Hišće wjetše je přihłosowanje mjez dźěćimi a młodostnymi. W drje reprezentatiwnym, ale njezawjazowacym naprašowanju bě něhdźe 84 procentow z nich za požadanje.