Moda w srjedźišću zajima stała

štwórtk, 13. junija 2019
artikl hódnoćić
(0 )
Na přikładźe figuriny je Rebecca Wöpperowa wčera rozłožiła, kak běchu so dźěle drasty w běhu lětstotkow změnili.  Foto: SN/Hanka Šěnec Na přikładźe figuriny je Rebecca Wöpperowa wčera rozłožiła, kak běchu so dźěle drasty w běhu lětstotkow změnili. Foto: SN/Hanka Šěnec

Budyšin (CRM/SN). Što je moda? Tele prašenje je wolontarka Budyskeho Serbskeho muzeja Rebecca Wöpperowa na wčerawšim zarjadowanju „Kofej w třoch“ na spočatk swojich wuwjedźenjow stajiła. Młoda sobudźěłaćerka poda tež hnydom wotmołwu: Rozumimy pod tutym zapřijećom žiwjenski stil kaž tež drastu we wěstej dobje, ale tohorunja we wěstym časowym rumje. Přetož hinaša bě wězo moda w starej Egyptowskej hač pozdźišo w Španiskej. Ludźo wužiwaja drastu jako škit před zymu a zranjenjemi, pokazuja pak z njej tež swój socialny status a swoju móc, wuwabjeja respekt, abo demonstruja swoju etnisku přisłušnosć.

Slědźo za drastu Serbow, a to přede­wšěm serbskich holcow a žonow, přeslědźi přednošowarka stare serbske nowiny minjeneho lětstotka. Anonsy drastowych wobchodow běchu předewšěm we Weimarskej dobje zajim budźili. „Pěkne bluzy“ poskići w Budyšinje Schaafec wobchod, a wobraz katolskeje Serbowki w narodnej drasće měješe runje tajku wabjensku funkciju. Tež Alfons Schauseil wabješe za „jaki a rubiška“ w Serbskich Nowinach.

wozjewjene w: Kultura
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND