Zhromadny projekt sakskich institutow mjezyetapu wotzamknył
Drježdźany/Budyšin (JK/SN). Digitalna prezentacija dokumentow na polu slědźenja w duchownowědnych wobłukach je minjene lěta dźeń a bóle na wuznamje přiběrało. Zhromadny projekt šěsć sakskich institutow na temu „Wirtualne archiwy za duchownowědne slědźenje“, přewjedźeny wot meje 2017, je kónc junija w Drježdźanach dalšu mjezyetapu wotzamknył. Znowa prezentowachu wobdźělnicy staw swojich projektow, mjez nimi Serbski institut z Budyšina. Projektownicy wobdźělenych institutow, zastupjerjo statneho ministerstwa za wědomosć a wuměłstwo kaž tež fachowcy na polu digitalizacije a archiwoweho slědźenja zetkachu so w rumnosćach Sakskeje krajneje a uniwersitneje biblioteki SLUB.
