Wot prezentacije ansamblow srjedźoeuropskich krajow k poskitkam z pjeć kontinentow
Na IV. festiwalu kónc junija 2001 je štyrista serbskich a třista wukrajnych ludowych wuměłcow wjace hač 9 000 zahorjenych přihladowarjow zawjeseliło, mjez nimi prezidenta Sakskeho krajneho sejma Ericha Iltgena (CDU). Najdlěši puć k nam měješe georgiski ansambl „Schiwi“ ze stolicy Tbilissija, kotryž bě pjeć dnjow z busom po puću. Z temperamentnymi a elegantnymi rejemi postarachu so Georgičenjo wo błyšćaty wjeršk programow. Skupiny „Bodrog“ Madźaroněmcow, „Hajdenjaki“ Chorwatow z Dolnjeje Pulje w awstriskim Gradźišću, „Csango“ Madźarow z Rumunskeje, „Kliszczacy“ Góralow, „Kyczera“ a „Kaszuby“ z Pólskeje a w Čěskej bydlacych młodych Grjekow w narodnej drasće swojeje stareje domizny žnějachu za předstajenja wichorojty přiklesk. Jara skutkownje su Chróšćanscy šulerjo na wohroženje swojeje Serbskeje srjedźneje šule „Jurij Chěžka“ předstejaceho zawrjenja 5. lětnika dla w swjedźenskim ćahu a na swjedźenišću skedźbnjeli.