Pančičansko-Kukowska wohnjowa wobora swjeći 150. róčnicu wobstaća
„Dobrowólny wohnjowy wobornik być je čestnohamtskosć, a čestnohamtskosć njeje scyła tak samozrozumliwa. Zhladujo na dobrowólnu wohnjowu woboru w Pančicach-Kukowje rěčimy wo 150 lět trajacym skutkowanju. A tež to njeje samozrozumliwe, zo so wohnjowa wobora hižo połdra lětstotka čestnohamtsce spochi za wohnjoškit zasadźa. Za to w mjenje wšitkich wobydlerjow cyle sprawny a wutrobny dźak!“ Tole zwurazni Markus Kreuz (CDU), Pančičansko-Kukowski wjesnjanosta a „načolny wohnjowy wobornik“.
14. a 15. septembra swjeći wohnjowa wobora Marijineje hwězdy na Pančičanskim klóšterskim dworje 150. róčnicu wobstaća. Za to přihotuja swjedźeń z Božej mšu, swjatočnosću a wulkim wubědźowanjom z ručnymi pryskawami (Handdruckspritze). Přeprosyli su sej susodne wohnjowe wobory kaž tež přećelow-kameradow z Čěskeje a Bayerskeje.