Sernjany swjeća lětsa 600. róčnicu prěnjeho pisomneho naspomnjenja. Rodźeny Sernjančan a dobry znajer stawiznow delanskich wsow Pawoł Rota je někotre stawizniske zajimawostki wo wsy zestajał, kotrež čitarjam Serbskich Nowin we wjacorych dźělach spřistupnjamy:
Zorno da muku
Prěni Sernjančenjo běchu zahrodnicy a rólnicy. Tuž tež žito plahowachu. Ze zorna z wulkej prócu mjez kamjenjemi šudrujo muku mlějachu. „Zorno da muku“ je nas Handrij Zejler w pjatej štučce swojeje pěsnje „Hanka, budź wjesoła“ spěwać nawučił. Zahoriće tež Sernjanska młodźina po skónčenju Druheje swětoweje wójny tutu a druhe serbske narodne pěsnje, spěšnje nawuknywši, při kóždej składnosći a bórze wot prěnjeje hač do poslednjeje štučki z hłowy zanošowaše! Žana zetkanka bjez spěwa.
Tež na prěnich powójnskich rejach, ke kotrymž Chróšćan Deleńkec holcy na akordeonach, Běrmichec dujerjo z Haslowa a pozdźišo wjele lět Hórčan Paški wone znate serbske melodije do rejki hudźachu. Jako něhdy we wsy knježi dwór hospodarić započa, wědźachu ludźo hižo ćěrjacu móc wody zaměrnje wužiwać.