Brigada, SLA, Wudworčenjo a Malte-Rogacki-band „Hrodźišćo“ předstajili
Chrósćicy (SN/bn). Wjeršk lětušeho jubileja před 70 lětami załoženeje 1. serbskeje kulturneje brigady bě prapremjera oratorija „Hrodźišćo“ sobotu w kopatej połnej Chróšćanskej wjacezaměrowej hali „Jednota“. Wopytowarjo dźakowachu so dohromady něhdźe 120 sobuskutkowacym kaž tež komponistej Měrćinej Weclichej a libretistce Madlenje Nasticcynej z dołho trajacym přikleskom a trójnej „Sławu“. Produkciju spěchowałoj stej Załožba za serbski lud a kulturny rum Hornja Łužica-Delnja Šleska.
