Přećelska porada jej wažna

srjeda, 09. oktobera 2019
artikl hódnoćić
(0 )
 Fachowa poradźowarka SŠT w Delnjej Łužicy je Mila Zachariasowa (naprawo).  Foto: SN/Maćij Bulank Fachowa poradźowarka SŠT w Delnjej Łužicy je Mila Zachariasowa (naprawo). Foto: SN/Maćij Bulank

Wot 1. oktobra 2019 skutkuje Mila Zacha­riasowa tři dny wob tydźeń jako fa­chowa poradźowarka za žłobiki, pěsto­warnje a horty ze serbskorěčnym poskitkom w Delnjej Łužicy. Milenka Rječcyna je so z kubłarku rozmołwjała.

Što je Was wabiło nadawk přewzać?

M. Zachariasowa: Wo tym wobłuku dźěła bě hižo rěč w lěće 2013, a to ze Serbskim šulskim towarstwom, Rěčnym centrumom WITAJ w Choćebuzu kaž tež z braniborskim ministerstwom za młodźinu, kubłanje a sport. Pohnuło k tomu bě prašenje, kak ludźi na bazy podpěrać. W lěće 2015 so Serbskemu šulskemu towarstwu poradźi mje jónu wob tydźeń z dźěła jako kubłarka wuswo­bodźić. Tak móžach do druhich skupin w dalšich dźěćacych dnjowych přebywanišćach hić, zo bych tam projekty a didaktiske dźěło podpěrała.

Što běše zakład wo tym rozmyslować, facho­we poradźowanje zawjesć?

M. Zachariasowa: To bě cyle jednorje mysl, kak dóstanjemy wjace serbskosće do wšědneho dnja w žłobikach, pěstowarnjach a hortach. Wjedli smy wosobinske rozmołwy z kubłarkami, kak móhli wotpowědne projekty spěchować. Zdobom zwěsćichmy, kelko zwučowanja w serbskej rěči je trěbne, zo bychu přistajeni při sposrědkowanju poskitkow dźěćom wěsći byli. Zdźěla běše tak, zo mě­jachu kubłarjo wulke wočakowanja, abo běchu strachoćiwi. Tuž sym wosebity puć pytała, kak jim naležnosć zbližić. Sym tuž sama projekty a poskitki přewjedła, kubłarki pak su přihladowali.

Ma to tež přichodnje tak wostać?

M. Zachariasowa: Nětko sej přeju, zo kubłarki zhromadnje ze mnu poskitk dźeń do toho přihotuja, a to zwonka skupiny. Wuknjenski poskitk měł po po­trjebje w kubłanišću, w skupinje być. Při tym je wšojedne, wo kotru temu so jedna, hač dźe wo to, zdobyć sej samostatnosć, abo wo zaběru z wosebitosćemi počasa. Rěčny­ přihot ma intensiwny być, tak zo móže kubłarka potom w skupinje poskitk derje a wěsće přewjesć. Ja ju při tym přewo­dźam. Wuhódnoćenje wot­měwa so wospjet zwonka skupinskeho dźěła.

SŠT je nošer jeničce dweju dźěćaceju dnjoweju přebywanišćow w Delnjej Łužicy. Dosahatej wonej, zo móžeće nadawk poradźowanja spjelnić?

M. Zachariasowa: Poskitk so přichodnje rozšěri. Njeńdźe jeničce wo to, poradźować kubłarki a kubłarjow w pěstowarnjomaj „Mato Rizo“ a „Wila Kunterbunt“, kotrejž stej w nošerstwje SŠT. Staram so přichodnje wo 14 dźěćacych dnjo­wych přebywanišćow ze žłobikom, z pěstowarnju a hortom a wo 40 kubłarjow a kubłarkow. Tele ličby mi zmóž­njeja so wužadanjam indiwiduelnje zbližić. Njeza­běramy so z projektami, kotrež jako poradźowarka do zarjadnišćow přinjesu. Skerje dźe wo to zwěsćić, wo čim je runje trjeba w tej abo tamnej skupinje rěčeć.­ Chcu přistajenym pomhać, za čož mam hinaše zjawnostne dźěło wukonjeć, hač sym to dotal činiła. Tuchwilu so w dźě­ćacych dnjowych přebywanišćach předstajam. A tak mam składnosć, so z ku­błarjemi a kubłarkami wosobinsce rozmołwjeć.

Zwotkel bjerjeće nazhonjenja za tele skutkowanje?

M. Zachariasowa: Sym wukubłana kubłar­ka a mjeztym 20 lět w powołanju skutkuju. Běch lěta 2013 mjez tymi, ko­třiž­ su ideju wo fachowym poradźowanju zrodźili a ju pozdźišo ministerstwu zbližili. Při tym mějach něhdyšeho nawodu Rěčneho centruma WITAJ w Cho­ćebuzu Měta Nowaka poboku. A wot lěta 2015 sym jónu wob tydźeń kubłanišćam poradu poskićała. Tak dóstach dohlad do pedagogiskeho dźěła a zwěsćich, zo je poradźowanje dźěłowy wobłuk, kotryž chcu wupjelnić. Chcu druhich podpěrać, a to skerje na přećelskej runinje. Kubłarki a kubłarjo njeměli so mje jako pruwowarki bojeć, ale jako přećelsku podpěraćelku widźeć.

A kak wotměwa so komunikacija mjez sobu­dźěłaćerjemi, kotrychž wopytaće?

M. Zachariasowa: To je wšelako. W Žylowskej pěstowarni „Mato Rizo“ njerěčimy jenož w skupinje serbsce, ale tež mjez sobu jako kubłarki. Mjez ku­bła­rje­mi w tych 14 dźěćacych dnjowych zarjadnišćach tež někotři delnjoserbšćinu wu­knu. Woni wobknježa zakłady na schodźenku europskeho rěčneho ramika B1 abo B2. Ja jich intensiwnje na wu­knjen­ske poskitki za dźěći přihotuju, zo bychu rěčnje kmani byli.Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND