přesmyk SplügenPoslednje metry na wjerškFacit: Tura njebě perfektna –
njejsmoj wšitke swoje cile docpěłoj.
Zwjetša mějachmoj špatne wjedro, najebać to
smój wšitko bjez wulkich ćežow a blesurow přetrałoj. Podhódnoćiłoj
běchmoj na kóždy pad mjezyčłowjesku komponentu – bjez dźiwa, hdyž njemóžeš sej połsta
dnjow dołho z puća hić. Kóždy ma swoju heju a chce ju po móžnosći přesadźić. Hač jězbne tempo, dnjowe
cile atd. – časćišo mějachmoj so we włosach, na zbožo pak so přeco wupowědachmoj. A tak móžemoj z trochu wotstawkom rjec: Smój něšto wulke docpěłoj, na čož budźemoj cyłe žiwjenje hordaj!
Njesměrnje motiwowanaj jědźechmoj po wuspěchu w Šwicarskej dale do Francoskeje. Jara špatne wjedro wšak namaj turu skazy, zymny dešć nimale kóždy dźeń bě chětro njepřijomny. Čim wyše jědźechmoj, ćim wjac sněha namaj do mjezwoča placaše. Skónčnje docpěchmoj Chamonix, hdźež wjedra dla dźeń čakachmoj, prjed hač dźěše na highlight tury – na Mont Blanc (4 810 m). Najprjedy dźěše kaž přeco někotre kilometry z kolesom horje, na to pěši dale, doniž njewupakowachmoj swoje sněhaki.