Aktualne towaršnostne temy w srjedźišću lětušeho ptačeho kwasa SLA
Radwor/Kulow (SN/bn/JaW). Runoprawosć, emancipacija, debata wo splahowych rólach, strukturna změna, klima, narcistiska politika – lětuši wječorny ptačokwasny program Serbskeho ludoweho ansambla „Štóž so zwaži, tomu so radźi“ narěznje nimale wšitke palace temy tuchwilneho towaršnostneho diskursa. W srjedźišću scenarija, spisaneho wot Wita Bejmaka, steji młoda žona, kotraž zrodźi zhromadnje z přećelkami na zakładźe cybnjeneje myslički naročny hospodarski plan z naposledk globalnymi wuskutkami. Do toho pak, zo stanje so z ideje wuspěšny łužiski start-up, dyrbi protagonistka tójšto zadźěwkow přewinyć, mjezyčłowjeskich runje tak kaž moralnych. Jednotliwe sceny cyłkownje najwobšěrnišeho dźiwadłoweho podźěla minjenych lět zwjazuja chór a orchester pod nawodom Andreasa Pabsta kaž tež balet, raz podawki na jewišću podmolujo, často pak tež komentujo.