Wustajeńca předstaja 14 000 lět stawiznow brunicoweho rewěra
Běła Woda (SN/CoR). Hižo 25 lět přewodźeja archeologojo nimale wšědnje wudobywanje wuhla we Rychwałdskej a Wochožanskej jamje. Prěni raz předstaja nětko namakanki ze swojeho dźěła w bliskim Běłowodźanskim Muzeju za škleńcu, a to wot dźensnišeho z wosebitej wustajeńcu „Bijakojo kamjenja, warjaki smoły, łamarjo wutroby – 14 000 lět stawizny we Łužiskim brunicowym rewěrje“. Sakski krajny zarjad za archeologiju (LfA) je ju w kooperaciji z Drježdźanskej fachowej wysokej šulu wuhotował, iniciěrowało je ju spěchowanske towarstwo muzeja za škleńcu a energijowe předewzaće LEAG je projekt podpěrało. „Wustajeńca je něšto wosebite. Tajke něšto dotal hišće njebě. Wjeselimy so, zo je so radźiła“, rjekny nawodnica Běłowodźanskeho Muzeja za škleńcu Christine Lehmann.