Ansamblowcow a intendantku jenož pušćenje Andreasa Pabsta njerozdwoja
Budyšin (SN/CoR). Štož je so loni nazymu z njepodlěšenjom zrěčenja chóroweho direktora Serbskeho ludoweho ansambla Andreasa Pabsta započało, je telko njeměra w zawodźe zbudźiło, zo su žołmy mjeztym krajnu runinu docpěli. Tak njepisaja w aktualnym wudaću časopisa Zjednoćenstwa němskich operowych chórow a jewišćowych rejwarjow „Oper und Tanz“ jenož wo tym, zo sobudźěłaćerjo SLA pušćenje Pabsta njerozumja, ale tež, zo „nawjedowacy stil intendantki SLA Judith Kubicec“ „z taktowym kiješkom a z křudom“ „dźeń a wjetše iritacije w sobudźěłaćerjach zbudźa“. Dale tam rěka, zo wona „skerje na konfrontaciju hač na konstruktiwnu wuměnu“ sadźa.
