Sakska zahaji imagowu kampanju „Sorbisch? Na klar“

Budyšin (SN/CoR). Sakska ministerka za kulturu Barbara Klepsch (CDU) je wčera imagowu kampanju „Sorbisch? Na klar“ zahajiła. „Chcemy z njej na serbsku rěč skedźbnić, wědu wo njej šěrić a akceptancu kaž tež hódnoćenje nałožowanja rěče w zjawnosći stopnjować. Mnozy Němcy wšak wotpokazuja, zo so w jich přitomnosći serbsce rěči. Jeli ći, kotřiž serbšćinu njerozumja, praja: ,Móžeće dale serbować, to mje njemyli‘, da smy zaměr docpěli“, wuzběhny wona na nowinarskej konferency w Budyskim Serbskim domje w přitomnosći zapósłancow krajneho sejma Franziski Schubert (Zwjazk 90/Zelenych) a Alojsa Mikławška, bywšeje předsydki sakskeje serbskeje rady Marje Michałkoweje a mnohich serbskich čłonow přirady kampanje. Předsyda Domowiny Dawid Statnik witaše, zo Sakska z kampanju „w ludnosći wo sympatiju za serbšćinu wabi“ a přeješe jej „wjele wuspěcha“. Nawodnica Rěčneho centruma WITAJ dr. Beata Brězanowa skedźbni na to, zo su mjeztym wjacori młodźi němscy starši wotewrjeni za serbšćinu.