Knježerstwo chce powólnjenja wobzamknyć, napomina pak dale kedźbu

Drježdźany (SN). Po wčerawšim dojednanju zwjazkoweho knježerstwa a zwjazkowych krajow nastupajo powólnjenja w zwisku z koronawirusom chce Sakska jutře wotpowědne postajenja a konkretne naprawy wobzamknyć. Prěnja kročel budźe wotstronjenje wobmjezowanja wuchadźenja. To rěka, přichodnje njetrjebaja wobydlerjo wjace „wažnu přičinu“, zo bychu dom wopušćili. Nimo toho powjetši so kruh ludźi, kotřiž smědźa so zwonka swójskeje domjacnosće zetkać, wo dalšu wosobu. Tak mjenowana „kontaktna zawěra“, potajkim mjezsobny wotstawk znajmjeńša 1,5 metrow, pak dale płaći, nošenje škitnych maskow so dale „raznje doporuči“. Tež zakaz wopyta chorownjow, starownjow, bydlenskich zhromadnosćow z ambulantnym hladanjom kaž tež bydlenskich skupinow zbrašenych dale wobsteji. Wjetše zeńdźenja, kaž na přikład koncerty, dźiwadłowe předstajenja, ale tež Bože mšě, po nowym wukazu dowolene njejsu.