Załožba za serbski lud mytuje „serbski poskitk tydźenja w syći“
Budyšin (SN/CoR). Załožba za serbski lud je poměrnje spěšnje na dźeń a wjetšu digitalnu kreatiwitu ludźi w času korona-pandemije reagowała a 16. apryla wubědźowanje „Serbski poskitk tydźenja w syći – SPTWS 2020“ wuwołała. Wšitke wosebite serbskorěčne digitalne poskitki předstajeja na internetnej stronje https://info.sorben.com/se/sptws/ a najlěpše tydźensce mytuja, a to přeco štwórtk ze sto eurami. Nad małym financnym připóznaćom wjeselili su so dotal hižo Njebjelčanska pěstowarnja „Jan Skala – Barbojte kamuški“ z widejowym rjadom „Lotka a Sophia“ kaž tež młodostni wokoło Dennyja Gloxyna z filmom wo – tónraz chětro hinašich – přihotach křižerjow na jutry w Ralbicach.