Ze sportom šulerce pomhali

wutora, 04. awgusta 2020
artikl hódnoćić
(0 )
Emanuel Brühl z Noweje Wjeski je z koparskim bulom žonglěrował, Adrian Mička z Bronja mjez druhim daloko skakał a Ławrjenc Bobka z Miłoćic kulu storkał (wotlěwa). Tójšto ludźi bě so w aprylu a meji na njewšědnej sportowosocialnej akciji wobdźěliło. Kilian Hrjehor Emanuel Brühl z Noweje Wjeski je z koparskim bulom žonglěrował, Adrian Mička z Bronja mjez druhim daloko skakał a Ławrjenc Bobka z Miłoćic kulu storkał (wotlěwa). Tójšto ludźi bě so w aprylu a meji na njewšědnej sportowosocialnej akciji wobdźěliło. Kilian Hrjehor

Njewšědna akcija nětko wuhódnoćena

Serbski Sokoł z.t., třěšny zwjazk serbskich sportowčow a sportowcow a spěchowanske towarstwo wyšeje šule „Michał­ Hórnik“ Worklecy z.t. stej zhromadnje njewšědnu sportowu akciju přewjedłoj a runočasnje socialny projekt na Wor­klečanskim kubłanišću podpěrałoj. Nětko je wšo tak daloko wuhódnoćene.

Z nowinskim rěčnikom Serbskeho Soko­ła Janom Hrjehorjom z Róžanta je so Jurij Bjeńš rozmołwjał.


Jano! Dwaj měsacaj po sportowosocialnej akciji někotři čitarjo SN přeco hišće nje­wědźa, što sće w času wotsrjedź apryla dosrjedź meje na sportowe nohi stajili.

J. Hrjehor: Wot noweho šulskeho lěta 2020/2021 změja na Worklečanskim kubła­nišću w 5. lětniku šulerku, kotraž ma genetiski defekt. Přez njón njehodźa so nastate škody pruhow słónca (UV-­pru­hi) na koži reparować, a tak twori koža raka. Xeroderma pigmentosum (němsce „Mondscheinkrankheit“) njehodźi so hojić. Wažne je, zo so pacient konsekwentnje před UV-pruhami škita. Gmejna Worklecy dyrbi tuž kubłanišćo za wjele tysac eurow přetwarić. Sakska drje přetwar spěchuje, ale tež swójski podźěl nošerja je trěbny. Z akciju „Sportować a pomhać“ smy Worklečansku gmejnu podpěrać chcyli a wězo tež šulerku.

Snano hišće někotre informacije k wot­běhej sportowosocialneje akcije?

J. Hrjehor: Přewjedli su ju w času pan­de­mije. Poprawom bě běh sponsorow na Worklečanskim kubłanišću planowany, štož pak móžno njebě. Tuž je Sokoł digitalny formular wuwił, do kotrehož mó­žeše kóždy swój wosobinski sportowy wukon sam zapisać. Wšitko bě bjez wubědźowanskeho charaktera, za to pak z prawym socialnym charakterom. Wšitcy smědźachu so wobdźělić, wšo­jedne hač pěstowarske dźěćo, młodźina, wowka, dźěd, rentnarka abo rentnar. W poskitku mějachmy běhi/jogging, ko­leso­wanje, liče­nje kročelow, žonglěro­wanje z koparskim bulom a kategoriju „nochcu sportować, za to pak kubłanišćo podpěrać“.

Na twojim pisanskim blidźe widźu wše­lake statistiki k sportowosocialnej akciji. Što móžemoj z nich wuwidźeć?

J. Hrjehor: 33 dźěći a dorosćenych ze wšěch starobnych klasow je so wobdźě­liło. Předsydka spěchowanskeho towar­stwa Worklečanskeje wyšeje šule Antje­ Bobcyna pak je nam zdźěliła, zo bě tójšto ludźi cyle jednorje pjenjezy na kon­to spěchowanskeho towarstwa přepokazało, bjeztoho zo by digitalny formular wupjelniło. Ličba tych podpě­raćelow nam znata njeje. Z našeje wuhódnoćenskeje statistiki je wuwidźeć, zo su wšitke starobne skupiny (sk) pjeć hač do 70 lět zastupjene. Najwjetši podźěl ma z 20 procentami sk 11 (10 a 11 lět) a po stajnje 12 procentach sk 70 (61 do 70 lět), sk 15 (14 a 15 lět) a sk 9 (8 a 9 lět). W sportowych družinach su „tykancowe kruchi“ poměrnje jenak wulke. Najwjace wobdźělnikow pak je běhało (23,3 procenty) a kolesowało (23,3 proc.). Ličenje kročelow a kategorija bjez sportowanja stej z 20 procentami jenak wulkej. 13,3 proc. sportowcow su z bulom žonglěrowali.

Widźu tu hišće wuhódnoćenski diagram, w kotrymž steja wšelake časy a dny ...

J. Hrjehor: Kóždy wobdźělnik je sam rozsudźić směł, kak dołho sportuje. Tu bě spektrum chětro wulki. 10, 15 abo 30 minutow abo tež dwójce popołdnju, 20 dnjow abo wjacore hodźiny. Zwjetša (18,2 procentaj) su sportowče a sportowcy 15 mjeńšin wolili.

Nětko čitarki a čitarjow zawěsće hišće zajimu­je, hdźe wšudźe su wobdźělnicy sportowali a zwotkel woni běchu.

J. Hrjehor: Wjetši dźěl bě z Worklec a wokoliny. To rěka z Chrósćic, Smječkec, Róžanta, Kamjenca, ale tež z Budyšina. Smy pak tež wosebitych wobdźělnikow měli, na přikład holcu z Neubrandenburga, dweju hólcow z Drježdźan a sportowču z Wopakeje.

Sće poprawom tež wědźeli, zo bě w Chrósćicach sponserski běh planowany, kiž je na horjeka mjenowanu iniciatiwu Serbskeho Sokoła nastał?

J. Hrjehor: Ně, to nam znate njebě. Jako­ pak su Serbske Nowiny a Serbski rozhłós wo tym rozprawjeli, smy so wězo jara wjeselili. To bě překwapjenka.

Na kóncu hišće prašenje k wunoškej sporto­wosocialneje akcije. Kelko pjenjez sće za přetwar Worklečanskeho kubłanišća nazběrali.

J. Hrjehor: Wot wšeho započatka su pjenjezy na konto spěchowanskeho towarstwa Serbskeje wyšeje šule „Michał Hórnik“ Worklecy běželi. A na njón žadyn­ přistup nimamy. Na te prašenje móže­taj jenož Antje Bobcyna a financnik towarstwa wotmołwić. Ja sym w medijach sumu 15 000 eurow słyšał.

A planuje Serbski Sokoł dalšu akciju na socialnym polu?

J. Hrjehor: Ně, chcemy so rady zaso ze sta­rej koparskej gardu wubědźować, a to w oktobrje w Kamjencu pod swětłomjetakami. Turněr steji nětko najprjedy raz na prěnim městnje našich nadawkow. Haj, a potom dyrbimy tež hišće 38. sokołski wolejbulowy turněr wo pokal Domowiny nachwatać.

Wutrobny dźak za rozmołwu!

wozjewjene w: Sport

Galerija

dalši wobraz (1) Emanuel Brühl z Noweje Wjeski je z koparskim bulom žonglěrował, Adrian Mička z Bronja mjez druhim daloko skakał a Ławrjenc Bobka z Miłoćic kulu storkał (wotlěwa). Tójšto ludźi bě so w aprylu a meji na njewšědnej sportowosocialnej akciji wobdźěliło. Kilian Hrjehor
dalši wobraz (2) Emanuel Brühl z Noweje Wjeski je z koparskim bulom žonglěrował, Adrian Mička z Bronja mjez druhim daloko skakał a Ławrjenc Bobka z Miłoćic kulu storkał (wotlěwa). Tójšto ludźi bě so w aprylu a meji na njewšědnej sportowosocialnej akciji wobdźěliło. Kilian Hrjehor
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND