Zwjazkaj chcetej uniju tworić

póndźela, 10. awgusta 2020
artikl hódnoćić
(0 )
Koparski zwjazk Hornja Łužica a Zapadołužiski koparski zwjazk chcetej w nowej hrajnej dobje na polu žonjaceje kopańcy hromadźe dźěłać.  Foto: Jörg Stephan Koparski zwjazk Hornja Łužica a Zapadołužiski koparski zwjazk chcetej w nowej hrajnej dobje na polu žonjaceje kopańcy hromadźe dźěłać. Foto: Jörg Stephan

Nowinki ze žónskeje kopańcy

Zapadołužiski koparski zwjazk (WFV) ma wotpohlad, wot sezony 2020/2021 na polu žónskeje kopańcy uniju z Koparskim zwjazkom Hornja Łužica (FVO) wutworić. Doskónčne rozmołwy wo tym tele dny wjedu a wuslědki zjednoćenstwam potom sčasom zdźěla.

Slědowace mustwa koparkow su za planowany hrajny modus přizjewjene: ze Zapadołužiskeho koparskeho zwjazka ST Hnašecy-Dobruša, Zeleno-běłe Bu­kecy a ST 1859 Wjernarjecy; z Koparskeho zwjazka Hornja Łužica LSV Friedersdorf, Módro-běłe Obercunnersdorf, Zeleno-běłe 90 Uhsmannsdorf a SV Zodel 68.

WFV ma tež zwonka wokrjesa w žónskej kopańcy dwaj cyłkaj zastupjenej. Bisko­pičanske KT startuje dale ze swojim prěnim žónskim mustwom w regionalnej lize Sewjerowuchodneho koparskeho zwjazka (NOFV). K tomu sćele nowoze­stajane druhe zastupnistwo do krajneje klasy na hońtwu za wrotami. Koparki Hlinow­skeho SC rozžohnuja so z małym hrajnišćom na wokrjesnej runinje. Wone chcedźa so na wulke hrajnišćo zwažić a tak na krajnu runinu. Lěta dołhe dobre dźěło w dorosće zjednoćenstwa to nětko zmóžni.

Wólnočasnu ligu zapřijeć

Nimo horjeka mjenowaneje unije chce Zapadołužiski koparski zwjazk skónčnje spytać hižo eksistowacu wólnočasnu ligu žonow sobu zapřijeć. To je trjeba, zo móža so holče mustwa tež konformnje po prawidłach sportowsce měrić. Tu su tohorunja hižo prěnje rozmołwy wjedli kaž tež wo tym, směrnicy žónskeje kopańcy we WFV přiměrić. Slědowace mustwa su tu­časnje wobdźělene: SG Frankenthal, ST Nadrózna Hrabowka, Natwar Němske Pazlicy, SV Lomnitz, FV Ottendorf-Okrilla a HZ Großharthau/Bretnig-Hauswalde. Kilian Hrjehor

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND