Po serbskich stopach po Praze rěka nowy serial w Serbskich Nowinach. W nim wjedźe Pražan Marek Krawc čitarjow na městnosće w čěskej stolicy, kotrež maja za nas Serbow wulki wuznam.
Stowěžata Praha přiwabja ze swojim romantiskim kuzłom kóžde lěto njeličomnych turistow ze wšeho swěta. Za Serbow měješe a ma wona cyle wosebity wuznam. Wšako mějachu tu serbscy katolscy duchowni a studenća móžnosć, so z pomocu čěskich přećelow na rěčnym a narodnym polu wukubłać a swój słowjanski rjap skrućić. Za toho abo tamneho Serba je město hišće dźensa tajna stolica Serbow. Tuž witajće k nam a nastajće so ze mnu na puć po serbskich stopach w čěskej stolicy.
