NSLDź zahaji pjatk nowu hrajnu dobu z mnohimi wjerškami

Budyšin (SN/CoR). Wčera dopołdnja měješe­ intendant NSLDź Lutz Hillmann hišće rozmołwu z Budyskim strowotniskim zarjadom, připołdnju na nowinarskej konferency móžeše wón zwjeselacu powěsć šěrić: Nowa hrajna doba w Bu­dyskim Němsko-Serbskim ludowym dźiwadle budźe! Zakład za to twori koncept, kotryž ličbu městnow we hłownym domje na 216 społojči: Kóždy druhi rynk móže publikum wužiwać. Zaručene ma być, zo hodźa so móžne infekcije naslědować. Gastronomija tež budźe, ale žana garderoba, ludźo smědźa so jenož jednosměrowje pohibować. „Wjeselimy so, zo zarjadniska lěkarka koncept do­wola a zo móžemy zaso hrać, byrnjež wotstawk tohorunja na jewišću dodźeržeć dyrbjeli“, rjekny Lutz Hillmann.