Pola faworita jasnje podleželi

póndźela, 14. septembera 2020
artikl hódnoćić
(0 )
Štóž dokładnje na wobraz hlada, widźi dźěl trawnika w powětře. Hra w Budestecach bě tak spěšna, zo su samo hruzle lětali.  Foto: Jörg Stephan Štóž dokładnje na wobraz hlada, widźi dźěl trawnika w powětře. Hra w Budestecach bě tak spěšna, zo su samo hruzle lětali. Foto: Jörg Stephan

ST Horni kraj/Sprjewja – Sokoł Ralbicy/Hórki 4:0 (2:0)

Zestawa hosći: Schöne – Lešawa (68. Nuk), Wałda, Bejma, Matka, Šewc, Rawš (79. Budar), Šołta, Gloxyn, Schultz, Šiman (88. Kobalc)

Po domjacym dobyću přećiwo Módro-běłym Kulow nastajichu so koparjo Sokoła Ralbicy/Hórki sobotu do Budestec. K faworitej na staflowe dobyće jědźechu chowancy trenarja Chrystofa Gloxyna z wulkim sebjewědomjom, byrnjež z Pětrom Domašku, Měrćinom Kurjatom a Paulom Rachelu hnydom třo wažni akterojo pobrachowali. Za to pak nawróći so kapitan Stani Šewc do zestawy.

Taktika delanskich bulkoparjow bě wot spočatka jasna: robustnje w defensiwje stać a na kontery łakać. To so jim spočatnje dosć derje poradźi, w 27. min. pak docpěchu koparjo z Hornjeho kraja po róžku nawjedowanje. Krótko do toho mějachu hosćo z Ralbic najlěpšu móžnosć w prěnim połčasu, ale sylny kop Filipa Šimana z 20 metrow wrota jenož wo centimetry misny. Domjacy dachu bul jara derje běžeć a so stajnje přez křidle hač do šěsnatki kombinowachu. Tak dóstachu tójšto róžkow, kotrež běchu nimale stajnje jara strašne. Sokoljo mějachu po zastatku swoju lubu nuzu, porjadk dźeržeć a wěsće zakitować. Hač do połčasa pak dyrbješe wrotar Willi Schöne bul hišće jónu z klětki wzać. Jan Mečíř prasny wólny kop krasnje do róžka (35.).

Krótko po znowazahwizdanju měješe Michał Matka najlěpšu šansu cyłeje hry, jako bul z 12 metrow na wrota třěli. Domjacy wrotar pak tomu z wulkotnym refleksom zadźěwa. Sokoljo spytachu w dalšim času wšitko, ale strašnje so před wrotami hižo njejewjachu. Štwórć hodźiny do kónca zwyšichu koparjo z Hornjeho kraja na 3:0. Sudnik pokaza po dótknjenju Aleksandera Wałdy přećiwo jeho kontrahentej na ominozny dypk, a wottam postara so Petr Mečíř wo předrozsud. Mjeńšinu do kónca přijimachu Sokoljo samo hišće štwórte wrota, znowa po róžku.

Kapitan Sokoła Stani Šewc po hrě: „Domjacy běchu wězo wulki faworit, štož tež přez cyły čas pokazachu. Jich dobyće bě zasłužene, tež hdyž snano dwoje wrota přewysoke. Wosebje přećiwo technisce jara sylnym hrajerjam z Čěskeje mějachmy swoju lubu nuzu. Njedźelu doma přećiwo Wojerecam pak chcemy zaso tři dypki docpěć!“ Jurij Bjeńš

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND