Budyšin (SN/bn). „Pućowanje po hudźbnym swěće Serbow“ bě hesło koncerta za wiolinu a wiolu, z kotrymž staj Rostockski husler a komponist Malte Hübner kaž tež bračist Berlinskeje Komiskeje opery Martin Flade wčera něhdźe dwa­ceći zajimcam na žurli Budyskeho Serbskeho muzeja radźeny dohlad do łužiskich wuměłskich stawiznow sposrědkowałoj. „Pućować po znatych šćežkach kaž tež do dotal njeznatych kućikow móže překwapjace dožiwjenje być a nadźiju kaž tež dočasne wjeselo wuskutkować“. To wuzběhny Malte Hübner, kiž je zdobom jako moderator pozadk a wuběr twórbow zarjadowanja zjimał.