SLA hač do kónca 2022 wobšěrnje přetwarja a planuja 19 premjerow
Budyšin (SN/bn). „To je wokomik, na kotryž smy dołho čakali. Wot lěta 2016 smy planowali, a nětko móžemy twarske dźěła 19. oktobra zahajić. Hłowny zaměr je, Serbskemu ludowemu ansamblej raz woprawdźiteho hrajnišća spožčić kaž tež wuměnjenja za wuměłcow a publikum polěpšić“, připowědźi direktor Załožby za serbski lud Jan Budar na wčerawšej nowinarskej konferency w Budyskej Röhrscheidtowej bašće.
Z pomocu digitalneje prezentacije rozłoži Budar jednotliwe naprawy. Najwobšěrniši podźěl zaběra nowotwar južneho baletneho trakta. „Stare twarjenje wotpowěduje nastupajo sanitarne wuhotowanje, elektriku a nuzowe wuchody stawej 1970tych lět. Smy zwěsćili, zo je tuńšo je zwottorhać a z wjetšim, dwuposchodowym twarjenjom narunać.“
