Foće: Kerstin Šołćina, Michał BrězanTo bě wulke wjeselo, jako Dawid Róbl z wjesneho taksijoweho a busoweho wozydłownistwa do „Chróšćan kołća“ přichwata a jeho chowancam hnydom pjeć nowych koleskow přepoda. Wězo smě kóžde dźěćo jězdźidła wužiwać a z nimi po zahrodźe a pu­ćikach pěstowarnje smalić. Dawid Róbl bě při prěnich pospytach rady pódla a je wjeselo dźěći dožiwił. Wutrobnje so jemu za wulkotny a swojorazny dar dźakuja dźěći a kubłarki „Chróšćan kołća“.

Wosrjedź oktobra přewjedźe skupina Chróšćanskeje pěsto­warnje z mjenom ,,wišnina“ wose­bitu akciju. Starši a dźěći skupiny wutworichu na za­hrodźe pěstowarnje wučbnu šćežku čućow a zmysłow. Kóždy wotdźěl šćežki je z hinašej maćiznu pjelnjeny. Tak su to kamjenje, split, drjewo, pěsk, hable abo roły z plastiki a wšelake maty. Zaměr bosyběhanja po šćežce je sej tak noze masěrować a na tamnej stronje maćizny začuwać. Drjewo za wotdźělenje a wobrubjenje šćežki je firma Garten Art Měrćina Krala z Pančic-Kukowa dariła. Na spočatku a kóncu šćežki pak su starši brězy sadźili, kotrež maja dźěćom w lěću chłódk spožčić.