Za naprašnik nastupajo narodnu drastu sej chwile brać

Wojerecy (SN/MiR). Serbske towarstwa, zarjadnišća, institucije, dźěćace dnjowe přebywanišća, šule, nošerki serbskeje narodneje drasty, hotowarniče a jednotliwcy dóstanu přichodne dny list z třomi naprašnikami. To připowědźa projektowa koordinatorka Jadwiga Pjacec z Drježdźan. „Z listom prošu čłonow towarstwow a dalšich wo podpěru při wupjelnjenju a rozšěrjenju. Chcu wot nich zhonić, ke kotrym přiležnosćam so serbsku drastu hotuja, kak to činja a hdźe ju składuja“, wona rozjasnja. „Zdobom wjeselu so na wšitke informacije, kak je k tomu dóšło, zo na přikład towarstwo drastu ma, štó je ju zešił atd., ale tež wo tym, kotre ideje za dalewuwiće narodneje drasty maja.“