18. łužiska filmowa přehladka prěnje myta lětušeho CFF spožčiła
Choćebuz (SN/CoR). Dwanaćelětny Anton Fischer z Heideblicka we wokrjesu Dubja-Błóta je wčera wječor ze swojim přinoškom „IT – ein fremder Freund“ hłowne myto 18. łužiskeje filmoweje přehladki dobył. Dohromady dwanaće přinoškow z Hornjeje a Delnjeje Łužicy – połojca z nich serbskorěčnych abo ze serbskej tematiku so rozestajacych – bě so na wubědźowanju wobdźěliło, z kotrymž su inoficialnje 30. Choćebuski filmowy festiwal (CFF) zahajili, a to z podpěru nowiny Lausitzer Rundschau jako livestream. Jury hódnoćeše krótkofilm jako „měšeńcu wšědneho dnja, wuhotowanje połne fantazije a hrajneho wjesela“, jednacy wo přećelstwje hólca z roboterom z Marsa. „Wulki zaćišć“ zawostaji w jurorach tež „techniska wěda a kmanosć młodeho filmowca“. Myto je z 1 500 eurami dotěrowane.