Budyšin (SN/JaW). Rada Załožby za serbski lud je wčera jednohłósnje klětuši załožbowy hospodarski plan wobzamknyła. Gremij sćěhowaše wobsahowe priority, kotrež běchu serbscy radźićeljo zdźěłali. Kaž direktor załožby Jan Budar zdźěli, chce wona předewšěm swoje naprawy k regionalnemu skrućenju rěčnych rumow, k pokročowanju digitalizacije a k profesionalizaciji marketinga zesylnić. Přidatne aktiwity su móžne, dokelž wšitcy třo pjenjezydawarjo – Zwjazk kaž tež krajej Braniborska a Sakska – prawdźepodobnje swoje přiražki załožbje zwyša. „Parlamenty pak dyrbja to hišće wobzamknyć, tohodla njeje tuchwilu hišće žana doskónčna suma znata. Zo mamy nětko planowansku wěstotu a móžemy zdobom nowe pola skutkowanja natwarić, je wulka motiwacija do přichoda“, załožbowy direktor zwurazni.