Nimale třista ludźi je so na prěnim naprašowanju wobdźěliło

Budyšin (SN/CoR). „Šmóratko“ je serbske słowo lěta 2020. Za ryzy serbsku rěčnu wunamakanku je so 40 procentow ludźi, kotřiž su so na naprašowanju našeho wječornika wobdźělili, rozsudźiło. Wuraz wopisuje smartfon, po kotrehož wobrazowce z porstom šmóraš. Jasnje je so přećiwo „nahubnikej“ na druhim městnje z 28 procentami hłosow přesadźił. Hromadźe stej sej słowje „šmóratko“ a „nahubnik“ ze 68 procentami wjetšinu wšěch hłosow zdobyłoj.

Z wotstawkom sćěhuje na třećim městnje „homeoffice“ (dźesać procentow). Hakle na kóncu wothłosowanja wčera wječor je so tute jendźelske zapřijeće na trěće městno sunyło a tak zeserbšćenu požčonku „karantena“ z dźewjeć procentami na štwórte městno stłóčiło. Na dalšich městnach slěduja skrótšenka „SPTWS“ za „Serbski poskitk tydźenja w syći“ (štyri procenty), „koronakriza“ (tři procenty), „domjaca wučba“ a „teorija zapřisahańcy“ (wobě dwaj procentaj). Najmjeńši wothłós žněještej słowje „šćěpiwo“ a „incidenca“ (jedyn procent), kotrejž sej tak poslednje městno dźělitej.