Wjace serbskosće na festiwalach – Što pak akterojo pod tym rozumja?
Choćebuz (SN/bn). „Serbja a serbskosć na festiwalach“ bě hesło a zdobom hłowne prašenje sympozija, na kotrymž su wuměłcy, organizatorojo a dalši kulturnicy z cyłeje Łužicy předwčerawšim reprezentaciju serbskeje kultury na zarjadowanjach w regionje diskutowali.
Kaz hosćićel digitalneho zetkanja Daniel Häfner z Łužiskeho instituta spočatnje rozłoži, „njeje wotmysł našeho zeńdźenja, wutworić někajku absolutnu strategiju, ale pytać a wuspytać, kak hodźi so potencial dwurěčneho regiona wosebje tež za čas po brunicy lěpje wučerpać.“ Wuslědki rozmołwy kaž tež planowanych pokročowanjow chce „zjimać a Braniborskej poručacu rozprawu přepodać, zo bychu zamołwići politikarjo wuznamej kulturneho a kreatiwneho hospodarstwa wjace kedźbnosće wěnowali“.