Grodk (SN/MiR). Lětdźesatki hižo ma Łužica znjesć dóńt přetworjenja. Smy žiwi w času strukturneje změny, kotruž mjez druhim hudźbnik a komponist Felix Räuber, spěwar skupiny Polarkreis 18 („Allein Allein“), tematizuje. Za interdisciplinarnu produkciju DOMIZNA slědźi wón wo wobłukach zwuka a žiwjenja Sakskeje. Puć powjedźe jeho tež do Łužicy. Wón přebywa z kameru a mikrofonom we Wojerecach, Běłej Wodźe, Hamorje, we Wochožanskej jamje a při Bjerwałdskim jězoru. Rólu hrać maja Gundermann a serbske wsy. Tři z dźesać dźělow jeho rjadu zaběraja so tematisce z Łužicu (dalše informacije k tomu pod www.heimatlieder.net/inhalt). Třeći dźěl ma so Serbam wěnować. Räubera zaběra prašenje za tym, kak klinči Serbow najwažniši swjedźeń lěta – jutry na konju? Městnosće za filmowanje su Ralbicy a Róžant, Kulow, Slepo a hornjołužiska hatna krajina. Jako sobuskutkowacych zdoby Räuber kantora Daniela Wjeselu, chór křižerjow, Elviru Hančo a Kantorki.