Swójba Kašporec ze Židźinoho je znata za to, zo hižo wjele lět jutrowne jejka wóskuje. Jutrowne wiki w Nowej Łuce su Kašporec dźěćom něhdy puć k wuspěchej na tym polu ludoweho wuměłstwa wotewrěli.
Židźino (JoS/SN). W Židźinom knježi dojutrowna nalada, tež w Kašporec swójbje. 15lětna dźowka Emilia a jeje dwanaćelětna sotra Elea stej znatej z knihi wo jutrownych jejkach „Słónčne koło a wjelče zuby“, wudatej lěta 2016 wot Budyskeho Serbskeho muzeja. Pjeć lět pozdźišo wonej dale jejka debitej, zhromadnje ze swojimaj staršimaj. Emilia a Elea stej so kreatiwnje dale wuwiłoj. Emilia pyši jejka mjeztym hižo dlěje hač dźesać lět w bosěrowanskej a batikowej technice. Elea je jedno- a wjacebarbnje škraba. Nastork za to dała bě jej Grodkowčanka Renate Richter, kiž škrabanje perfektnje wobknježi a kotraž je tele wašnje debjenja na jutrownych wikach we Wojerowskej Łužiskej hali a Nowej Łuce prezentowała. Wona sposrědkowa Eleji trěbnu wědu wo mašinelnym škrabanju. Nowa technika holcu fascinuje. Tuž staj jej staršej wotpowědnu mašinu kupiłoj.
