Město Drjowk (Drebkau) je z Roswithu Baumertowej po Lotarje Balku dalšu nimorjadnu wosobinu města a serbskeho žiwjenja w Delnjej Łužicy zhubiło. Roswitha Baumertowa je 26. februara 78lětna zemrěła.
Hač do kónca žiwjenja je njeboćička wšu swoju móc za to zasadźała, zo by najwjetši pokład Drjowka, wot dr. Lotara Balka załoženy muzej Serbska tkalcownja sobu zachowała. Wo žiwjenski skutk dr. Balka, ale tež swojeho nana je so wona zaměrnje starała, tak zo sta so mały muzej z jeje žiwjenskim skutkom.
Sydomlětna je mała Roswitha pola swojeho nana Hanza Mazule nawuknyła jutrowne jejka debić. Wo nanje powědaja, zo bě wón multitalent, kotryž bě spočatk 1930tych lět swójske kreacije jutrownych jejkow naćisnył. Tajke je Roswitha Baumertowa wšón čas swojeho žiwjenja pisaniła. Jeje njesprócniwemu angažementej mamy so dźakować, zo nasta w běhu lět z wobšěrneje Balkoweje zběrki jutrownych jejkow z wulkej lubosću wuhotowany muzej, kotrehož nawod je wona lěta 2005 přewzała.
