Budyšin (SN/bn). Za premjeru knihi Svena Nordqvista „Wohnjostroj za lišku“ je so Ludowe nakładnistwo Domowina za wosebity, časej a wobstejnosćam wotpowědowacy format rozsudźiło. Minjeny pjatk su přełožowarka Diana Šołćina kaž tež Beno Šołta a Pětr Brězan w rólomaj titulneju rjekow druhu serbsku licencnu publikaciju rjadu „Pettersson a Findus“ online na platformje Edudip předstajili. Podobnje kaž na premjerje předchadneje, runje w druhim nakładźe LND znowa wušłeje knihi „Findus a hara z honačom“ před lětomaj w Róžeńće prezentowachu woni nowostku w formje sceniskeho čitanja – w kostimach a w swójsce wuhotowanej kulisy, dopominacej na piknik. Techniske móžnosće wirtuelneho swěta wužiwajo wudospołnichu tekst z widejowymi sekwencami. Tak na přikład pokazaštaj Šołta a Brězan z pomocu montaže w pospěšenju, kak w dźěłarni pasle konstruujetaj, z kotrymiž chcetaj překlepanu lišku přelesćić.