Krabatowe swjedźenske hry znowa wotprajene

Čorny Chołmc (SN/CoR). Štóž je sej loni swoje zastupne lisćiki za wupadnjene Krabatowe swjedźenske hry za lětuše wobchował, dyrbi to nětko dale. Tež lětsa woblubowany lětni dźiwadłowy spektakl pod hołym njebjom w Čornym Chołmcu njebudźe.

„Poprawom njeje hišće oficialne, fakt pak je, zo tež lětsa festiwal přewjesć njemóžemy“, rozłoži jednaćel Krabatoweho młyna Tobias Čižik na naprašowanje našeho wječornika. „Tež hdyž so pandemija w lěću změruje, přiwšěm z toho wuchadźamy, zo njesměmy před 800 ludźimi hrać. Za połojcu wopytowarjow pak njeje tajka produkcija absolutnje financujomna. Dyrbimy tuž swjedźenske hry bohužel chcyjo nochcyjo hišće raz přestorčić.“ Zastupne lisćiki wostanu za klětu dale płaćiwe, ludźo móža pak je tež wróćić, za čož dóstanu pjenjezy zarunane. „Tuchwilu rozmyslujemy wo tym, našemu publikumej něšto hinaše mjeńšeho razu poskićeć, tak impozantne kaž naš festiwal pak na žadyn pad njebudźe“, Tobias Čižik rjekny.