Přez lisćinu ke konsensej z Domowinu

srjeda, 12. meje 2021
artikl hódnoćić
(0 )

Stróža pola Hućiny (SN/at). Konsens z Domowinu wo wosobje, kotraž ma serbske zajimy w přichodnej Rozhłosowej radźe MDR zastupować, je Serbskemu sejmej bytostna naležnosć. Za dotalny kulturny a kubłanski wuběrk je Hagen Domaška na posedźenju minjenu sobotu w Stróži namjetował, kak postupować. Na zakładźe sejmej zdźělenych mjenow kandidatow a kandidatkow wuzwola jeho čłonojo jich na lisćinu. Wo tam zakótwjenych wosobach rozsudźi sejm. Lisćinu Domowinje přepodaja. „Naš narok je w konsensu z Domowinu wosobu pomjenować, zo njebychu ju zesłabili“, Domaška rozłoži. Bychu-li sejmarjo wobzamknyli jenož jednu wosobu pomjenować, „by Domowina lědma jednanjakmana była“. Kryje-li so mjeno na lisćinje z faworitom Domowiny, je serbski namjet z wida sejma jasny. Je-li pak třěšny zwjazk zasadnje hinašeho měnjenja, „zapodamy prěnje mjeno swójskeje lisćiny sami wólbnemu gremijej“.

wozjewjene w: Politika
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND