Luboznje hladane su rowy na Roholńskim (Riegeler) pohrjebnišću. Při wěži ze zwonom a ćěłowni dopomina swjaty křiž na stawizny městnosće. Widźeć je na nim lětoličba 1895, to bu wěža twarjena. „Spočatnje mějachmy jenož wěžu. Ćěłownju su hakle po Druhej swětowej wójnje přitwarili. Wobydlerjo natwarichu ju w mnohich dobrowólnych hodźinach z pomocu ‚narodneho natwarneho skutka‘“, powěda gmejnski a wjesny radźićel Hagen Aust. Starši wobydlerjo wědźachu tójšto wo stawiznach twara.

Přitwar jako mała ćěłownja nasta hakle w lětach 1963 do 1968. Twarski nawoda bě tehdy Richard Dutschmann. Zwón na wěžu běchu 1955 pójsnyli. K wažnym přiležnosćam zwonješe w prěnich lětach Emma Knote, pozdźišo Ralf Knote. Mjeztym wukonja nadawk nětko hižo dlěje hač 50 lět Heinz Dutsch­mann. Wón čini to stajnje, hdyž je wobydler wsy zemrěł, k pohrjebam. Štomowa aleja při pohrjebnišću a wodowy přizamk tam nastaštej spočatk 1950tych lět.