Wuměłstwowy bus budźe w awgusće znowa w regionje po puću

Wojerecy (AK/SN). Sedmy raz wot lěta 2014 wotměje so akcija Wuměłstwowy bus. 14. a 15. awgusta wěnuje so wona Wojerowskej kónčinje. Zwjazować chce stacije Hórnikečansku Energijowu fabriku, we Wojerecach hród a muzej, Kulturnu fabriku kaž tež Konrada Zusowy kompjuterowy muzej, Čornochołmčanski Krabatowy młyn a kulturnu cyrkej Łuty. Iniciator a organizator je wuměłstwowa iniciatiwa „Im Friese e. V.“ Šěrachow-Korzym hromadźe z partnerami. Patronatka je Budyska přirjadnica Birgit Weber.

„Chcemy ludźi za wuměłske a kulturne pokłady Łužicy sensibilizować. Projekt je, dalokož wěmy, jónkrótny. Dokelž njepředstaja jenož wuměłstwowe městna, hižo busowa jězba sama je kulturne dožiwjenje“, podšmórny projektowy nawoda Helfried Christoph z předsydstwa iniciatiwy „Im Friese e.V.“. Dźesać „busowych“ wuměłcow – hudźbnicy wšelakorych žanrow – stara so wo zabawu mjez stacijemi. Z wotpohladom su termin za Wuměłstwowy bus 2021 do lětnich prózdnin połožili. Tak móža so tež swójby a turisća wobdźělić.