Studija Nicole Dołowy-Rybińskeje diskusiju mjez aktiwistami dźesać mjeńšinowych rěčow nastorčiła
Młodych zastupjerjow hnydom dźesać mjeńšinowych a małych rěčow je kniha „Nichtó to za nas nječini“ Nicole Dołowy-Rybińskeje njedawno wirtuelnje hromadu wjedła. „Naš cyły aktiwizm je z tej knihu zwjazany. Wuknjemy, wučimy, dokumentujemy a wožiwjamy tak wilamowšćinu – rěč mojeho ródneho města Wilamowice, kotraž bě so po lěće 1945 nimale dospołnje zhubiła. Chcemy sej dźensa nazhonjenja z podobnymi aktiwistami wuměnjeć a tak nowu móc za dalše skutkowanje čerpać“, witaše předsydka towarstwa Wilamowianie Justyna Majerska-Sznajder dalšich dwanaće wobdźělnikow kaž tež 150 hosći webinara. Na zarjadowanje bě wona hromadźe z awtorku a zastupowacej direktorku Instituta za slawistiku Pólskeje akademije wědomosćow Waršawa Nicole Dołowy-Rybińskej kaž tež z nawodu srjedźišća za keltiske studije prof. dr. Michaelom Hornsbyjom Poznańskeje Uniwersity Adama Mickiewicza přeprosyła.
