25. lětnje dźiwadło na Budyskim hrodźe zahajene
Dyrdomdeje Sherlocka Holmesa a dr. Watsona słušeja ke klasikarjam kriminalkow. Wšako su je hižo na najwšelakoriše wašnja adaptowali – jako hrajne filmy, telewizijne serije, słuchohry a za jewišćo. Tójšto z nich bě drje Lutzej Hillmannej runje tak z inspiraciju za lětuši spektakl pod hołym njebjom na Budyskim hrodźe kaž literarne předłohi Arthura Conana Doylea. Intendantej Němsko-Serbskeho ludoweho dźiwadła je so poradźiło, najbóle wusahowace kajkosće mišterskeho detektiwa a jeho přećela kaž tež dalšich figurow takrjec destilować, štož jemu zmóžni, jednanje 25. Budyskeho lětnjeho dźiwadła w 1960tych lětach zapołožić a swojorazny kosmos Doylea přiwšěm njewopušćić.