Z Budyskej Sundowner-baru tójšto za zhromadnosć Serbow a Němcow zdobyte

Štož je so lěta 2018 w małym započało, je so na woprawdźitu stawiznu wuspěcha wuwiło. Bě to takrjec pospyt, z kotrymž pak je Beno Brězan połnje do čorneho trjechił. Hižo jako šulski hólčec bě sej wnučk znateho serbskeho spisowaćela Jurja Brězana přał, zo měli tehdy trochu pustu zahrodu na ležownosći Serbskeho ludoweho ansambla za rjeńše zaměry wužiwać. Před třomi lětami je so wón tuž sam gratu přimał. Mjeztym je Sundowner-bara tak woblubowana, zo Beno Brězan swojim hosćom poruča so po móžnosći telefonisce hač do 19 hodź. přizjewić, zo bychu městno po přeću za najrjeńšim wuhladom nad siluetu Budyšina kaž tež pohlad na chowanje słónca dóstali. Tež spontani wopytowarjo stajnje hišće městno namakaja, wón změruje.

Lětuša sezona bary saha wot julija do awgusta, potajkim přez cyłej měsacaj. 30. junija bě zahajenje a wulke finale planuja za posledni kónc tydźenja w žnjencu. Potom wotměje so w Budyšinje zdobom staroměšćanski swjedźeń, kotrehož poradźenju chce Beno ze swojim mustwom a baru přinošować.