Serbski institut wutwori wotrjad za regionalne wuwiće a škit mjeńšin

Budyšin/Choćebuz (SN/CoR). Dohromady 11,7 milionow eurow přidatnje změje Serbski institut wot klětušeho přichodne dźesać lět k dispoziciji, zo móhł dwě nowej předewzaći zwoprawdźić. Srědki wot Zwjazka za změnu strukturow we wuhlowych regionach dyrbja w Braniborskej wužiwać (SN rozprawjachu). Nimo zdźěłanja wobšěrneho digitalneho łužiskeho atlasa přiwza braniborske ministerstwo za wědomosć, slědźenje a kulturu tež namjet, kotryž bě jemu institut hižo w lěće 2018 prěni raz dał a na to dale wuwił: wutworić nowy wotrjad za regionalne wuwiće a škit mjeńšin. Ze 6,2 z cyłkownych 19 milionow eurow je to najwjetši ze šěsć serbskich inwesticijow Braniborskeje za přichod Łužicy z „wuhloweho hornca“. Sakska njeje hišće wo swojich spěchowanskich srědkach rozsudźiła.