„Njemóžeš do přichoda hladać, ale móžeš zakład za njón tworić – přetož přichod móžeš twarić.“ Antoine de Saint-Exupéry

Rjana to myslička, kotraž je tež dźěło Uty Sykoroweje wobwliwowała. Po tym zo bě 20 lět jako kubłarka w Rakečanskim ,,Raju pjerachow“ dźěłała, nawjedowaše wona kubłanišćo wot lěta 2001. Po 45 słužb­nych lětach je so njedawno z powołanskeho žiwjenja rozžohnowała. Na zahrodźe pěstowarnje su so dźěći, kubłarki, zastupjerjo nošerja Křesćansko-socialneho kubłanskeho skutka (CSB), gmejny a cyrkwje, staršiskeje rady kaž tež Rakečanskeju šulow a wohnjowa wobora zhroma­dźili. Jim bě wažne, so Uće Sykorowej za wjelelětne angažowane a profe­sionelne dźěło dźakować.

Na wosebje lubozne wašnje pokazachu holcy a hólcy swój dźak. Kóžda z cyłkownje wosom pěstowarskich skupin je wosebite spěwčki a reje na­zwučowała a z wjele energiju přitomnym předstajiła.