Intensiwny futurologiski sympozij „Wodychnjenje – stawizny nastanu!“
Kamjenc (SN/CoR). Přestrjenc ze zjednoćeneje serbsko-němskeje chorhoje wodźeše něhdźe 20 zajimcow wčera popołdnju do futurologiskeho sympozija „Wodychnjenje – stawizny nastanu!“ w Kamjenskej klóšterskej cyrkwi swj. Hany, wotměwacy so we wobłuku 4. festiwala šesćiměstow „Přińć a woteńć“. „Wy sće tu akterojo, kotřiž móža dźensa tu naćisnyć, kak ma poćah mjez Serbami a Němcami přichodnje wupadać“, staj moderatoraj – w Halle skutkowacy dźiwadźelnik a režiser Stanisław Brankačk a swobodna režiserka-dźiwadłowowa pedagogowka Juliane Meckert z Lipska – přitomnych witałoj. W srjedźišću bě wulke hrajnišćo z třomi polemi „Haj“, „ně“ a „móžno“ wuhotowane – na nje stupachu so potom ludźo, wotmołwiwši na jednotliwe prašenja moderatorow. „Sće němski(a) abo serbski(a)?“ rěkaše prěnje, mnohe dalše slědowachu.