Zajim za informacije wo Łužiskich Serbach bě a je dale njewšědnje wulki
Liberec/Budyšin (SN/MiR/CoR). Lěto Łužiskich Serbow w Liberecskim kraju je ze swojim poskitkom zarjadowanjow zajim mjez mnohimi Čechami za Serbow a Łužicu zbudźił. „Smy přewšo wjeseli, zo je so nam poradźiło nimale wšitke zarjadowanja, kotrež běchu w lětomaj 2019/2020 planowane, přewjesć, byrnjež koronapandemije dla alternatiwne terminy a online-formaty poskićeli“, zwěsći hłowna organizatorka projekta a předsydka towarstwa Societas Amicum Liberec (SAL) Jana Vančatová. Někotre zarjadowanja dyrbjachu samo na lětsa přestorčić a dalše budu klětu.
