Modernje archiwowane daty dźěło wolóžeja a skića nowe móžnosće

Budyšin (mg/SN). Serbske institucije swoje daty w přiběracej měrje digitali­zuja. Tak su na přikład Serbske Nowiny před lětomaj započeli swój fotowy archiw modernje zawěsćeć. Wudaća ćišćanych medijow Ludowe nakładnistwo Domowina tohorunja dlěje hač lětdźesatkaj digitalnje składuje. „Wot lěta 2017 su tak wudaća serbskeho wječornika z wot­powědnym abonementom wužiwarjam w syći přistupne“, informuje šefredaktor SN Janek Wowčer.

Ale nic jenož w LND z digitalizaciju postupuja. W Budyskim Serbskim muzeju stara so Aleksander Pólk w nowym de­poće na Lubijskej wo digitalizaciju wobsydstwa institucije. Wšako runje do noweho składa přećahuja, štož bě muzejej nastupajo digitalizaciju wulki krok do­prěd­ka. Tak su objekty kaž mólby systematisce fotografowali, štož je za digitalny archiw wažne. Z nim narunaja krok po kroku dotalny archiw z kartajemi. „Z wosebitym programom inwentarizujemy wšitke objekty, kotrež mamy. To hižo wjacore lěta běži, njeje to žadyn nowy proces“, Pólk rozłožuje.