Budyšin (SN/bn). Bara Sundowner na zahrodźe Serbskeho ludoweho ansambla je wjace hač „jenož“ korčma pod hołym njebjom ze spektakularnym wuhladom na Budyske stare město. Prawidłownje wuhotuja tam najwšelakoriše kulturne zarjadowanja. W tym zwisku dožiwichu wopytowarjo – žane městno njezwosta njewobsadźene – minjeny pjatk cyle wosebity wjeršk. Skupina Brankatschki bě sej wjacorych hosći přeprosyła a zamó z nimi publikum zahorić.